Vorfasnachtsweekend 2019 Leukerbad

Am letschte Wucheend bevor ändlich eusi Fasnacht startet, sind mir das Joor ins Wallis greist. Nach fast 4 Stund Carfahrt hei mir Leukerbad erreicht, wo mir eusi Unterkunft hei chönne bezieh. Nach em Uftritt uf dr Dorfplatzbühni hei mir denn an dr Guggeparade in richtig Sportarena teilgnoh, wo ahschliessend dr "Western-Guggerball" statt gfunde het. Nach däm glungene Fest isch es am Sunntig wytergange mit eme Abstächer uf d Skipiste :P

Bi schönstem Wätter hei mir denn euses Weekend uf dr Terrasse vom Restaurant Weidstubli, direkt an dr Skipiste chönne loh usklinge und hei au dört no zwei mol eusi Lieder zum Beste geh.. Nachdem mir mit Schlitte, Schneetöff oder z Fuess wieder d Ski-Piste abe cho sind und eusi Instrument vom Schneetöff us wieder im Car verstaut gsii sind, hei mir eus bereits wieder uf e Heimwäg gmacht. Äs isch es super Weekend gsii mit vielne lustige Erinnerige und em einte oder andere Bier.. 

Danke dä Tschabu-Schränzer das mir hei dörfe cho! Jetzt sind mir definitiv ready und freue eus um so meh uf eusi Fasnacht! (do wärde mir au nümm komisch ahgluegt wenn mir mit Zoggeli und Larve unterwägs sind :P)