Fasnachtsumzug Lupsigä und Guggeträffe in Nuglä

Wie jedes Joor hei mir au im 2019 zwei Wuche vor dr Liestler Fasnacht (Samstig 23. Feb.) am Umzug in eusem Heimatdorf Lupsige mitgmacht. Bi schönem Wätter und vor vielne Zueschauer hei mir so euse ersti Umzug im neue Joor chönne absolviere. Ahschliessend hei mir wie scho im letschte Joor zämme mit dr Jugendgugge es Konzert uf em Schuelhuusplatz gspielt. Viele Dank für d Organisation vo dem Ahlass, mir freue eus immer druff wenn mir in eusem Dorf dörfe spiele!

 

Am Obe isch es denn grad fasnächtlich wyter gange, nämmlich mit eusem Uftritt in Nugle am Guggeträffe vo de Schwarzbuebeschränzer. Au dört sind mir scho fast Stammgäst ;)

Nach eusem (wie so oft) sehr spote Uftritt sind no vieli vo eus lang am Fest bliibe und hei gfyret bis in die früehe Morgestunde.. Und nach Absproch mit de Verahstalter hei mir sogar no dörfe hälfe ufruumä und ä schöne Chroonlüchter für euse Proberuum chönne ergatterä! :P (Foti folgt)

Viele dank dä Schwarzbuebeschränzer für d Ihladig und für s erwähnte "Gschänk" !